Сайтка кириу

«АҚМАҢҒЫТ ТАМАРҚА ХЫЗМЕТИ» ЖУМЫС БАСЛАДЫ

Ҳәзирги күнде елимизде аўыл хожалығын жедел раўажландырыў ҳәм тамарқа жерлерден нәтийжели пайдаланыўды шөлкемлестириў баслы мәселелердиң бирине айланған. Сонлықтан да, Өзбекстан Республикасы Министрлер Кабинетиниң 2018-жыл 18-марттағы «Дийқан хожалықлары ҳәм тамарқа жер участкаларынан үнемли пайдаланыўды шөлкемлестириў ис-илажлары ҳаққында»ғы қарарының орынланыўын тәмийинлеў мақсетинде районымызда бир қатар илажлар әмелге асырылмақта. Атап айтқанда, халықтың үй қапталы жер майданларына азық-аўқатлық егинлерин егиў жумысларын шөлкемлестириў бойынша жумысшы топар ҳәм штаб шөлкемлестирилип, оның қурамы тастыйықланды. Соның менен бирге, барлық дийқан хожалықлары ҳәм тамарқа ийелериниң егислик жерлери хатлаўдан өткерилди.

Районымызда жәми 9182 дийқан хожалығы ҳәм тамарқа ийелери болып, оларда 829 гектар егислик жер майданлары бар. Ерте бәҳәрден 537 гектар жерлер егиске таярланып, бүгинги күнде пияз, капуста, картошка, сарымсақ пыяз ҳәм басқа да ерте писер дақыллар егилмекте.

– Пуқаралардың тамарқа жерлерин сүрип бериў, егиске таярлаў, оларға туқым ҳәм нәл жеткерип бериў мақсетинде «Ақмаңғыт тамарқа хызмети» жуўапкершилиги шекленген жәмийетин шөлкемлестирдик, — дейди усы жәмийет баслығы П.Жумамуратов. – Енди жең түринип иске кирисетуғын пайыт келди. Себеби, ўақыт күтип турмайды. Алдағы ўақытлары халыққа хызмет етип, исенимин ақлаў нийетиндемиз, -дейди ол.