Сайтка кириу

Страницы

«ШОРКӨЛ»ДЕГИ ҚАБЫЛЛАЎ

Пуқаралардың машқалаларын үйрениў ҳәм бул машқалаларды өз орнында шешиў мақсетинде кеше район ҳәкими, Халық қабыллаўханасы ҳәм тийисли тараў басшылары қатнасында көшпели қабыллаў болып өтти.

 

«Тақыркөл» АПЖ «Шоркөл» аўылында болып өткен көшпели қабыллаўда аймақ турғынлары өзлерин көп жыллардан берли қыйнап жүрген машқалалары менен мүрәжат етти. Әсиресе, аймаққа балалар бақшасын, дәрихана, халыққа турмыслық хызмет көрсетиў орынларын ашып бериў ҳәм медициналық хызмет көрсетиўдиң сапасын жақсылаў, аўылдың ишки жолларына оңлаў жумысларын әмелге асырыў бойынша мүрәжатлар билдирилди.

Мәселен, көшпели қабыллаўда аймақ турғынларынан Г.Турғанова келинлерин жумыс пенен тәмийинлеў, аўылға балалар бақшасын ашып бериў бойынша мүрәжат еткен болса, Н.Алламуратова ҳәм Ж.Мадияровалар турмыслық хызмет көрсетиў орынларын ашыў бойынша усынысларын билдирди. Сондай-ақ, А.Оспанова аўылдың ишки жолларын оңлап бериў бойынша мүрәжат етти.

Мүрәжатлардың көпшилиги сол жердиң өзинде унамлы шешимин тапты. Ал, айырым мәселелер бойынша тийисли тараў басшыларына тапсырмалар берилди.