Loading

wait a moment

БАЛАЛАРҒА БЕРИҢ, ДҮНЬЯНЫ…

«Халық аралық балаларды қорғаў күни» пүткил дүнья балалары ушын ең пәк ҳәм қуўанышлы байрам есапланады. Әлбетте, бала бул дүнья, бул өмир мазмунының ең ажыралмас бөлеги. Балалар өз күлкиси арқалы инсанлар қәлбинде өмирге, жасаўға деген қызығыўшылығын оятады. Көзлеринде меҳир қалқып турған бала ашық аспанда еркин пәрўаз етип атырған қарлығашқа мегзес.

1-июнь, яғный жаздың 1-күни дүньяның дерлик барлық еллеринде келешегимиз ийелери ушын ҳәр түрли концертлер, көргизбелер, сейиллер, спорт жарыслары ҳәм түрли байрам илажлары өткериледи. Дем алыў орайлары болса балалардың күлкиси менен мисли әжайыбатлар дүньясына айланады. Мәмлекетимизде де бул байрам ҳәр жылы кеўиллерде қуўаныш пенен белгиленеди.

Усындай байрам илажларынан бири Нөкис районы Балалар дем алыў бағында 1-июнь «Халық аралық балаларды қорғаў күни» мүнәсибети менен «Балаларға бериң, дүньяны…» атамасында байрам илажы болып өтти. Илажда район ҳәкими А.Сейтахов сөзге шығып, барлық байрам қатнасыўшыларын қутлықлап, бул байрам елимиздиң ҳәр бир орнында кең түрде белгиленеди, себеби, елимиз әзел-әзелден балажан халық деген сөзлери менен байрам кешесин ашып берди. Соң районлық «Нураный» қоры баслығы Т.Абдижаббаров сөзге шығып, ол өз сөзинде перзентлери бәркамал, жаслары билимли ҳәм ўатанпәрўар болып өсип атырған ел қүдиретли, халық болса күшли болады, - деп илаж қатнасыўшыларын байрам менен қутлықлады.

Буннан соң районымыздың белсенди жасларына район ҳәкимлиги тәрепинен таярланған кийим-кеншек, оқыў қураллары ҳәм естелик саўғалары тапсырылды. Сондай-ақ, байрам шеңберинде қайырқомлық акциялары ҳәм илажлары шөлкемлестирилди.

Добавить комментарий

Ваш e-mail не будет опубликован. Обязательные поля помечены *